दिल्लीको होटेलबाट ३९ जना नेपाली युवतीको उद्दार

संबाददाता

नेपालएक्स्क्लुसिव डटकम :
वैदेशिक रोजगारीमा हिँडेका भनिएका ३९ जना नेपाली युवतीलाई भारतको एक होटेलबाटमा उद्दार गरिएको छ ।

नेपाली युवतीहरुलाई खाडी मुलुकमा बेचबिखनको लागि लैजान लागेको सूचनाको आधारमा दिल्लीस्थित महिला आयोगले पुलिसको सहयोगमा होटेलमा छापा मारेर ३९ जना नेपाली युवतीको उद्दार गरेको हो ।

उद्दार गरिएका ३९ जना युवतीहरुमध्ये तीनजनालाई दिल्लीमै उनीहरुका परिवारलाई जिम्मा लगाइएको छ । बाँकी ३६ जनालाई रुपन्देही प्रहरीको जिम्मा लगाइएको केआई नेपालको दिल्लीका उद्दार अधिकृत नवीन जोशीले बताए ।

उद्दार गरिएका युवतीहरुलाई भारतमा रहेको नेपाली दुतावसका कर्मचारी र केआई नेपालका कर्मचारीले रुपन्देही प्रहरीलाई बुझाएका छन् । नेपाली युवतीहरुलाई खाडी मुलुक र श्रीलंकामा बेचबिखनका लागि लैजान थालिएको अवस्थामा उद्दार गरिएको दिल्ली महिला आयोगकी अध्यक्ष स्वाति मालिवालले भारतीय सञ्चारमाध्यम आजतकलाई बताएकी छन् ।

नेपाली युवतीहरुलाई एकै स्थानमा राखेर विभिन्न स्थानमा बेचबिखन गरिरहेको सुचना प्राप्त पाएपछि होटेलमा छापा मारेर उनीहरुको उद्दार गरिएको उनले दावी गरेकी छिन् ।

दिल्लीको पहाडगंजस्थित हृदय इन नामक होटेलमा एक साथ बसेको अवस्थामा युवतीहरुलाई उद्दार गरिएको हो । उनीहरुको साथबाट राहदानी, नेपाली नागरिकता लगायत कागजपत्र फेला परेको छ । उनीहरु रहेको होटेलको कोठामा सिसिटिभी क्यामेरा समेत जडान गरिएको थियो । घटनाबारे दिल्ली पुलिस अनुसन्धान जारी राखेको बताइएको छ ।

यता रुपन्देही प्रहरीको जिम्मा लगाइएका ३६ जना युवतीलाई उनीहरुको परिवारलाई सम्पर्क गरेर जिम्मा लगाउन लागिएको जिल्ला प्रहरी कार्यालय रुपन्देहीका प्रहरी निरीक्षक अनुसन्धान अधिकृत उमेश जोशीले अन्नपूर्ण पोस्ट्लाई बताए ।

उनका अनुसार उद्दार गरिएका युवतीहरु गुल्मी, सुर्खेत, झापा, मोरङ र सुनसरी लगायतका जिल्लाका छन् । नेपालले रोजगारीको लागि बन्देज लगाएका तेस्रो मुलुकमा अवैधरुपमा जान लागेको अवस्थामा युवतीहरुको उद्दार गरी नेपाल ल्याइएको उनले बताए । उनीहरु इराक र कुवेत लगायतका मुलुकमा जाने तयारीमा थिए । उद्दार गरिएकामा अधिकांश २१ देखि ३५ वर्षका छन् । सोमबार एकजना युवतीलाई परिवारको जिम्मा लगाइएको छ ।

उद्दार गरी ल्याइएका २५ जना युवतीहरुलाई माइती नेपाल, ५/५ जनालाई केआई नेपाल र थ्री एन्जेल्सको आवासगृहमा राखिएको प्रहरीले जनाएको छ ।

२३ भाद्र २०७५, शनिबार ०७:१४

सम्बन्धित

सबै
तपाइको मत